Kinuwestiyon ng ilang senador ang testigo ng depensa ni Vice President Sara Duterte na si Davao City accountant Vingelin Bajan dahil sa umano’y pag-iwas nitong sumagot sa mga tanong tungkol sa dati niyang pagkakaugnay sa isang accounting firm.
Sa cross-examination, tinanong ni prosecutor Mae Divinagracia si Bajan kung naging bahagi siya ng Ampil, Elises, Ciudadano & Co., CPAs at kung nagsumite ito ng amended articles of partnership noong 2015 upang alisin ang kanyang pangalan bilang partner.
Bagama’t kalaunan ay kinumpirma ni Bajan na naging bahagi siya ng kompanya, ilang beses siyang hindi nakapagbigay ng agarang sagot kahit ipinakita na sa kanya ang mga dokumento. Dahil dito, kinuwestiyon ng mga senador ang kanyang kredibilidad at ang paulit-ulit na pagsasabing hindi niya matandaan ang mga detalye.
Iminungkahi ni Senador Raffy Tulfo na i-cite sa contempt ang mga testigong hindi nagbibigay ng malinaw na sagot, habang nagpahayag din ng pagkainip sina Senate President Francis Escudero at Senador Joel Villanueva.
Bahagi rin ng pagtatanong ang dating papel ng accounting firm bilang external auditor ng ilang kumpanyang may idineklarang business interests sina Duterte at kanyang asawang si Manases Carpio. Sinabi ni Bajan na hindi niya matandaan ang tungkol dito.
Samantala, kinumpirma ni Bajan na nagtungo siya sa China noong unang linggo ng Disyembre 2025 kasama ang kanyang mga kaibigan, ngunit itinanggi niyang kabilang siya sa mga opisyal ng Davao City na bumiyahe roon noong Enero 2026.
