Inaasahang mas maraming kabataang edad 15 hanggang 24 ang magkakaroon ng HIV pagsapit ng 2030 kung hindi mapalalakas ang mga hakbang sa pag-iwas at edukasyon, ayon sa AIDS Society of the Philippines.
Batay sa projection ng grupo, aabot sa 47,029 ang mga kaso sa nasabing pangkat ng edad pagsapit ng 2030, kumpara sa 17,446 sa mga edad 25 hanggang 30.
Ayon kay AIDS Society of the Philippines President Dr. Rossana Ditangco, kabilang sa mga pangunahing hamon ang kakulangan sa komprehensibong kaalaman tungkol sa HIV at pagkaantala sa paggamit ng mga serbisyong pangkalusugan, kabilang ang condom at iba pang paraan ng pag-iwas sa impeksiyon.
Batay sa datos ng grupo, 17 porsiyento lamang ng mga kabataang lalaki at babae sa pangkalahatang populasyon ang may komprehensibong kaalaman tungkol sa HIV.
Dahil dito, isinusulong ng grupo ang angkop na edukasyong seksuwal, mas madaling pag-access sa mga serbisyong pangkalusugan, at pag-aalis ng diskriminasyon laban sa mga taong nabubuhay na may HIV.
Samantala, naitala sa Pilipinas ang 4,367 bagong na-diagnose na kaso ng HIV mula Enero hanggang Marso 2026. Pinakamarami rito ang naipasa sa pamamagitan ng pakikipagtalik ng lalaki sa kapwa lalaki, na umabot sa 3,095 kaso.
Binigyang-diin din ng grupo ang kahalagahan ng pagsusuri sa mga buntis upang maiwasan ang paghahatid ng HIV mula sa ina patungo sa sanggol.
