Natuklasan sa isang pag-aaral na karamihan sa mga empleyado ng PhilHealth na nagtrabaho mula sa bahay noong kasagsagan ng COVID-19 pandemic ay nakaranas ng moderate stress, habang halos kalahati naman ang nag-ulat ng mild anxiety symptoms.
Isinagawa ang pag-aaral nina Dr. Myra D. Oruga ng University of the Philippines Open University, Jessica Mae D. Viray-Inciong ng PhilHealth, at Dr. Laili Rahayuwati ng Universitas Padjadjaran.
Gumamit ang mga mananaliksik ng survey sa 173 empleyado mula sa 11 tanggapan ng PhilHealth sa Metro Manila na kabilang sa 257 remote workers.
Karamihan sa mga kalahok ay mga may-asawa, kababaihan na nasa kanilang 30s, at nasa entry-level o casual positions.
Ginamit sa pag-aaral ang Perceived Stress Scale (PSS-10) at Generalized Anxiety Disorder Assessment (GAD-7) upang masukat ang antas ng stress at anxiety ng mga respondents.
Batay sa resulta, 96.32 porsiyento ng mga kalahok ang nakaranas ng moderate stress habang maliit na bilang lamang ang nagtala ng high stress levels.
Sa usapin naman ng anxiety, 49.69 porsiyento ang may mild symptoms, 40.49 porsiyento ang may kaunti o walang anxiety, at iilan lamang ang nasa moderate hanggang severe range.
Ayon sa mga mananaliksik, karaniwan ang moderate stress sa mga government workers dahil sa matinding workload pressures at institutional expectations.
Wala ring nakitang malinaw na kaugnayan ang stress at anxiety sa personal na katangian tulad ng edad, kasarian, at marital status, dahilan upang mas maituring na malaking salik ang kondisyon sa trabaho.
Kabilang sa pangunahing sanhi ng stress ang mabigat na workload, teknikal na problema, at hirap sa paghihiwalay ng trabaho at personal na buhay habang naka-work-from-home setup.
Inirekomenda ng pag-aaral ang mas malinaw na komunikasyon, mas maayos na access sa teknolohiya, at mas matatag na virtual support systems upang makatulong sa pagpapababa ng stress ng mga empleyado.
