Nahaharap si King Charles III ng United Kingdom sa panawagan ng ilang dating kolonya ng Britanya na humingi ng pormal na tawad at magbigay ng reparasyon para sa pang-aalipin at pang-aabusong naganap noong panahon ng kolonyalismo.
Nagsimula nitong Martes ang siyam na araw na pagbisita ng 77-anyos na hari sa Bahamas, Guyana, Antigua at Barbuda, kung saan sasamahan siya ni Queen Camilla sa huling bahagi ng biyahe.
Ayon sa Buckingham Palace, hindi iiwasan sa programa ng pagbisita ang pagtalakay sa tinawag ni Charles na pinakamadilim na bahagi ng kasaysayan ng Britanya.
Gayunman, iginiit ni Guyana President Irfaan Ali na unang hakbang lamang ang pagkilala ng hari sa madilim na nakaraan at dapat itong sundan ng pormal na paghingi ng tawad at pananagutan sa mga pinsalang idinulot ng kolonyalismo at transatlantic slave trade.
Noong nakaraang buwan, naghain ang Jamaica ng petisyon sa isang appellate court sa London upang isulong ang panawagan nitong reparasyon para sa mga ninunong Aprikano na inalipin sa loob ng daan-daang taon.
Nanawagan din si Commonwealth Secretary-General Shirley Ayorkor Botchwey na talakayin ang reparasyon, na maaaring sa pamamagitan ng pinansiyal na bayad o iba pang paraan.
Sa kabila ng mga panawagan, wala pang pormal na paghingi ng tawad mula sa mga modernong monarko ng Britanya, habang nag-aatubili naman ang pamahalaan ng United Kingdom na magbigay ng pinansiyal na kompensasyon.
