Hindi kinuwestiyon ng Malacañang ang desisyon ng House prosecution panel na iatras ang tatlo sa apat na articles of impeachment laban kay Vice President Sara Duterte, at sinabing bahagi ito ng legal na estratehiya ng prosekusyon.
Ayon kay Palace Press Officer Claire Castro, ang mga prosecutor ang higit na nakaaalam kung aling mga ebidensiya ang mas matibay upang suportahan ang kanilang kaso.
Noong Martes, inanunsiyo ng prosekusyon na hindi na nito itutuloy ang Articles I, III at IV na tumatalakay sa umano’y maling paggamit ng confidential funds, panunuhol at grave threats.
Dahil dito, Article II na lamang ang itutuloy ng prosekusyon, na may kaugnayan sa mga alegasyon ng hindi lubusang pagdedeklara ng mga ari-arian at kabiguang alisin ang sarili sa mga interes sa negosyo, na nagbunsod ng mga tanong tungkol sa umano’y hindi maipaliwanag na yaman ng Bise Presidente.
Pinayagan na ng Senate impeachment court ang pag-atras sa tatlong articles.
Dagdag ni Castro, maaari pa ring sagutin ni Duterte sa iba’t ibang paraan ang mga alegasyon laban sa kaniya, habang iginiit na mahalagang isaalang-alang ang mga ebidensiya at dokumentong iniharap sa paglilitis.
