Niyanig ng malakas na lindol ang bahagi ng Eastern Visayas kaninang bago mag-alas dos ng hapon, ayon sa Philippine Institute of Volcanology and Seismology.
Batay sa paunang ulat, naitala ang epicenter sa karagatang bahagi malapit sa Eastern Samar, na may lalim na humigit-kumulang 10 kilometro.
Naramdaman ang pagyanig sa iba’t ibang lugar sa Eastern Visayas, kabilang ang Leyte at Samar kung saan umabot sa Intensity 5 ang lakas ng lindol.
Samantala, Intensity 4 ang naitala sa ilang bahagi ng Leyte, habang Intensity 3 naman ang naranasan sa Southern Leyte at Sorsogon.
Umabot din ang mahinang pagyanig sa Cebu, Masbate, at Iloilo.
Sa inisyal na ulat, may naitalang bahagyang pinsala sa isang bahay sa Eastern Samar, habang wala namang naiulat na nasawi o malubhang nasugatan.
Sa Tacloban City, pansamantalang inilikas sa open area ang ilang pasyente at empleyado ng isang pribadong ospital bilang pag-iingat, ngunit agad ding kinumpirma na walang naitalang pinsala o injury.
Nagkaroon din ng panandaliang brownout sa ilang bahagi ng Tacloban at kalapit na lugar, ngunit naibalik din ang suplay ng kuryente makalipas ang ilang oras.
Samantala, nagsuspinde ng klase at trabaho sa ilang apektadong lugar bilang pag-iingat.
Ayon pa sa PHIVOLCS, posible ang mga aftershock, ngunit sa kasalukuyan ay wala pang naitatalang malalakas na pagyanig matapos ang pangunahing lindol.
Nilinaw din ng ahensya na walang banta ng tsunami kaugnay ng naturang lindol.
Patuloy ang isinasagawang monitoring ng mga awtoridad habang pinapayuhan ang publiko na manatiling alerto at sumunod sa mga safety protocol, at iwasan ang pagpapakalat ng hindi beripikadong impormasyon.
