Inanunsyo ng Department of Agriculture (DA) na magsisimula sa Disyembre 1 ang pagpapatupad ng P120 kada kilo na maximum suggested retail price (SRP) para sa pulang at puting sibuyas, bilang hakbang upang mapatatag ang presyo sa gitna ng tumataas na demand tuwing kapaskuhan.
Ayon sa DA, ang presyo ng imported na sibuyas ay karaniwang pumapasok sa bansa sa halagang humigit-kumulang P60 kada kilo, kaya itinuturing na sapat ang itatakdang SRP upang mapanatili ang makatarungang tubo sa bawat bahagi ng supply chain—mula importers hanggang retailers.
Bagama’t may bahagyang pagbaba sa suplay dahil sa pagkaantala ng ilang pag-angkat, iginiit ng ahensya na hindi ito dapat magresulta sa pagdoble ng presyo sa merkado.
Nitong mga nakaraang araw, nakapagtala ang Agribusiness and Marketing Assistance Service (AMAS) ng presyong umaabot hanggang P300 kada kilo sa ilang pamilihan.
Nagpahayag naman ng suporta ang ilang grupo ng mga tindero sa ipatutupad na price cap, ngunit humiling na maihatid sa kanila ang sibuyas sa presyong nasa P90 kada kilo at ipatupad lamang ang SRP kapag dumating na ang mga bagong shipment upang maiwasan ang pagkalugi sa mga dating nabili nilang mas mataas ang presyo.
Kaugnay nito, nangako ang Food Terminal Inc. na maglalaan ng imported na sibuyas sa parehong presyong P90 kada kilo sa cash-on-delivery na sistema. Inaasahang darating ang mga nasabing shipment sa loob ng dalawang linggo.
Tiniyak din ng DA na mananatiling bukas sa konsultasyon at posibleng pagbabago ang itinakdang SRP para sa lokal na sibuyas, lalo na kung tumaas nang malaki ang farmgate prices sa mga darating na linggo.
