Isinusulong sa House of Representatives ang panukalang batas na magbibigay ng bigas, groceries o cash incentives sa mga kabahayan at organisasyong magsusuko ng mga recyclable na basura.
Sa ilalim ng House Bill No. 11146 o “Basura to Ayuda Act” na inihain ni Quezon City 5th District Representative Patrick Michael Vargas, maaaring ipagpalit ang mga hindi mapanganib na recyclable materials sa pagkain o pera.
Batay sa panukala, ang isang kilo ng recyclable plastic ay maaaring ipalit sa isang kilo ng commercial-quality rice o katumbas nitong halaga sa cash.
Samantala, ang isang kilo ng basurang metal ay maaaring ipalit sa dalawang kilo ng bigas o katumbas nitong cash.
Ayon kay Vargas, hinango ang panukala sa Trash to Cashback program ng Quezon City government, na nagbibigay ng gantimpala sa mga residenteng nakikilahok sa waste management initiatives.
Sa ilalim din ng panukala, inaatasang magtatag ang Department of Environment and Natural Resources (DENR), Department of Agriculture (DA) at Department of Trade and Industry (DTI) ng mga pamantayang trade-in center at tiyaking pare-pareho ang halaga ng palitan sa iba’t ibang komunidad.
