Gumamit ng tear gas ang mga pulis sa Lyon, Lille, Toulouse at Nantes sa France laban sa mga demonstrador nitong Sabado, Oktubre 24, kasunod ng babala ng Interior Minister na si Laurent Nuñez na hindi kukunsintihin ang karahasan.
Umabot sa 70,000 pulis ang itinalaga sa iba’t ibang kilos-protesta ng Yellow Vests, mga unyon ng manggagawa at mga estudyante sa buong bansa.
Nauna nang inanunsyo ng pamahalaan na may mga nakumpiskang armas at 135 katao ang naaresto kaugnay ng mga protesta.
Sa Nantes, nagkaroon ng sagupaan sa pagitan ng mga pulis at mga demonstrador na nagtangkang pumasok sa sentro ng lungsod, kung saan ipinagbabawal ang mga pagtitipon.
Gumamit ang mga awtoridad ng water cannon, tear gas at stun grenade upang itaboy ang mga demonstrador. May ilang nagprotesta rin umanong naghagis ng maliliit na bagay sa direksiyon ng mga pulis.
Nagsimula ang mga kilos-protesta sa gitna ng panawagan para sa mas mataas na kakayahang bumili ng mga pangunahing pangangailangan at proteksiyon sa mga serbisyong pampubliko.
