Tinawag ni Senador Erwin Tulfo na “boycott” ang hindi pagdalo ng majority bloc sa plenary session ng Senado kasunod ng pag-aresto kay Senador Jinggoy Estrada.
Ayon kay Tulfo sa isang panayam sa Unang Balita, malinaw umanong indikasyon ng sama ng loob ng ilang senador ang hindi pagpasok ng majority sa sesyon noong Lunes matapos maaresto si Estrada kaugnay ng kasong plunder.
Giit niya, tungkulin ng mga mambabatas na magtrabaho para sa publiko at hindi ang lumiban sa sesyon dahil sa mga personal o kapwa-senador na isyu.
Sinabi rin ni Tulfo na nauunawaan niya ang emosyon ng ilan sa mga kasamahan, ngunit dapat umanong unahin ang kapakanan ng taumbayan at pagpapatuloy ng legislative work.
Ayon pa sa senador, walang pormal na abiso mula sa majority bloc na hindi matutuloy ang sesyon, at nagreklamo rin siya na naputol umano ang air-conditioning at Wi-Fi sa session hall.
Dagdag ni Tulfo, nakatakdang mag-caucus ang minority bloc para pag-usapan ang susunod na hakbang sa gitna ng kasalukuyang deadlock sa Senado.
Giit pa niya, handa ang minority na makipag-usap sa majority upang maibalik ang normal na operasyon ng sesyon.
Kasunod ito ng pag-aresto kay Estrada kaugnay ng kasong plunder at graft na may kinalaman sa umano’y iregularidad sa mga flood control projects, na nagdulot ng pag-igting ng tensyon sa pagitan ng dalawang bloc sa Senado.
