Ayon sa isang law professor, kahit amyendahan ang mga patakaran ng Senado para payagan ang remote participation o video conferencing ng mga senador, hindi pa rin ito sapat upang makalahok ang mga detenidong mambabatas sa mga sesyon nang walang pahintulot mula sa korte o custodial authorities.
Sinabi ni UP professor Paulo Tamase na ang mga panuntunan ng Senado ay hindi maaaring mag-utos sa ibang sangay ng pamahalaan, tulad ng mga korte, jail authorities, o maging international bodies, upang payagan ang virtual attendance ng mga detenido.
Ayon sa kanya, ang patakaran ng Senado ay maaari lamang magtakda ng posibilidad ng virtual participation kung maaaprubahan ang amyenda, ngunit wala itong kapangyarihang pilitin ang ibang ahensya ng gobyerno na ipatupad ito.
Ipinaliwanag pa niya na kung ang isang senador gaya ni Ronald “Bato” dela Rosa ay nasa kustodiya ng mga awtoridad sa Pilipinas, kailangan muna niyang humingi ng pahintulot mula sa mga lokal na hukuman kung mayroon siyang kinahaharap na kaso sa bansa.
Kung siya naman ay mailipat sa International Criminal Court, ang pahintulot para sa anumang uri ng partisipasyon ay dapat manggaling sa ICC.
Sa gitna ng diskusyon sa posibleng amyenda, nabahala ang ilang miyembro ng minorya sa Senado na maaaring magamit ito ng mga mambabatas na may kinahaharap na kaso o imbestigasyon.
Nagbabala rin si dating Senate President Franklin Drilon na maaaring makaapekto ang mga amyendadong patakaran ng Senado sa impeachment proceedings, dahil ang mga ito ay maaaring magsilbing supplementary rules ng impeachment court, kahit may sarili itong mga alituntunin sa subpoena.
