Ginawaran ng European Union ng 2026 Sakharov Prize for Freedom of Thought ang International Criminal Court (ICC) at mga opisyal nito bilang pagkilala sa kanilang mahalagang papel sa pagtataguyod ng international law at hustisya.
Inanunsyo ni European Parliament President Roberta Metsola ang parangal noong Huwebes sa Strasbourg, France, at binigyang-diin ang pagpapahalaga ng EU sa multilateralism at mga internasyonal na institusyon.
Ikalawang pagkilala ito sa ICC ngayong buwan, kasunod ng pagkakagawad ng Nobel Peace Prize kay dating ICC judge Navi Pillay, wala pang dalawang linggo ang nakalipas.
Dumating ang parangal sa gitna ng mga hamong kinakaharap ng korte, kabilang ang mga sanction na inanunsyo ni US President Donald Trump laban dito. Matagal nang tinututulan ni Trump ang ICC, lalo na matapos maglabas ang korte noong 2024 ng mga arrest warrant laban kay Israeli Prime Minister Benjamin Netanyahu at sa dati nitong defense minister.
Ayon kay ICC President Tomoko Akane, higit na mahalaga ang pagkilala sa gitna ng mga hamong kinakaharap ng korte. Binigyang-diin niya ang pangangailangan ng patuloy na kooperasyon at suporta ng mga bansa upang maisagawa ng ICC ang mandato nito nang malaya at walang kinikilingan.
Ipinagkakaloob taun-taon mula 1988 ang Sakharov Prize sa mga indibidwal at organisasyong nagtatanggol sa karapatang pantao at mga kalayaan.
