Pinayuhan ng Civil Aviation Authority of the Philippines (CAAP) ang mga pasaherong apektado ng pansamantalang pagsasara ng Basco Airport sa Batanes na makipag-ugnayan sa kanilang mga airline company para sa mga update sa flight at rebooking.
Pansamantalang isinara ang paliparan dahil sa bagyong Rosa.
Ayon kay CAAP Director General Retired Lieutenant General Raul Del Rosario, mahalagang subaybayan din ng mga pasahero ang mga opisyal na abiso ng ahensiya para sa mga susunod na anunsiyo.
Dahil sa pagsasara ng paliparan, kinansela ang dalawang biyahe sa pagitan ng Clark at Basco, na kinabibilangan ng PR2688 mula Clark patungong Basco at PR2689 mula Basco patungong Clark.
Umabot sa kabuuang 148 pasahero ang naapektuhan ng kanselasyon ng mga flight.
Bilang pag-iingat, siniguro rin ng CAAP ang mga pasilidad ng paliparan, kabilang ang mga bahaging may salaming bintana, upang maiwasan ang posibleng pinsala dulot ng malalakas na hangin.
Binigyang-diin ni Del Rosario na nananatiling pangunahing prayoridad ng ahensiya ang kaligtasan ng mga pasahero at mga tauhan ng aviation.
Patuloy rin ang pakikipag-ugnayan ng CAAP sa mga kinauukulang awtoridad at pagsubaybay sa lagay ng panahon bago muling buksan ang operasyon ng paliparan.
