Pinabulaanan ni Senator Alan Peter Cayetano ang pahayag ni Senator Panfilo “Ping” Lacson na umabot sa P700 million ang pondong umano’y nasayang sa loob ng mahigit isang buwang panunungkulan niya bilang Senate President.
Sa isang Facebook Live nitong Huwebes, Hunyo 18, kinuwestiyon ni Cayetano ang pinagmulan ng naturang alegasyon at iginiit na walang batayan ang paratang laban sa kaniya.
Hindi lamang si Lacson ang tinuligsa ng senador. Binanatan din niya ang magkapatid na sina Senator Raffy Tulfo at Senator Erwin Tulfo, na aniya’y nakikisawsaw sa pambabatikos sa kanya.
Nauna rito, sinabi ni Lacson na tinatayang umabot sa P700 million ang naging gastos sa panahon ng liderato ni Cayetano bilang Senate President.
Sa kanyang pahayag, binanggit ni Lacson ang ilang pangyayaring naganap sa gitna ng krisis sa liderato ng Senado, kabilang ang mga sesyong nauwi sa kaguluhan, mga boycott sa plenaryo, at mga pagdinig ng komite na kinuwestiyon ang legalidad at awtoridad.
Matatandaang naluklok si Cayetano bilang Senate President noong Mayo 11 matapos makuha ng majority bloc ang mayorya sa botong 13-11 laban sa noo’y liderato ni Senador Vicente “Tito” Sotto III.
Naging bahagi rin ng mga kaganapang iyon ang muling paglitaw ni Senador Ronald “Bato” dela Rosa sa Senado matapos ang ilang buwang pagtatago dahil sa banta ng pag-aresto kaugnay ng arrest warrant na inilabas ng International Criminal Court (ICC).
