Target ng Department of Health (DOH) na mabakunahan laban sa Human Papillomavirus (HPV) ang mahigit dalawang milyong mag-aaral sa buong bansa sa ilalim ng programang Bakuna Eskwela.
Ayon kay DOH Epidemiology Bureau Director Alethea de Guzman, nasa 2.007 milyon na mag-aaral mula Grade 4 at Grade 5 sa pampubliko at pribadong paaralan ang target na mabigyan ng bakuna. Tinatayang siyam na porsiyento sa mga ito ay mga out-of-school youth.
Ang Bakuna Eskwela ay taunang programa ng DOH katuwang ang Department of Education (DepEd) na naglalayong palawakin ang pagbabakuna sa mga mag-aaral. Kabilang sa mga bakunang ibinibigay sa ilalim nito ang laban sa HPV, tigdas, rubella, tetanus at diphtheria.
Ang HPV ay virus na maaaring magdulot ng cervical cancer o kanser sa kuwelyo ng matris. Batay sa datos na binanggit ng DOH, nakapagtala ang Pilipinas ng 7,829 kaso ng cervical cancer noong 2022.
Dahil dito, hinikayat ni De Guzman ang mga magulang at tagapag-alaga na kumuha ng tamang impormasyon tungkol sa HPV vaccine at pahintulutan ang kanilang mga anak na mabakunahan upang makatulong sa pag-iwas sa sakit.
