Mas pinipili ng kabataang nasa twenties na gamitin ang gym bilang lugar para sa social life at pagkakaroon ng bagong kaibigan kaysa lumabas sa mga bar o club.
Ayon kay Sydney Cassidy, 28 anyos na digital creator at fitness enthusiast, ang gym ay hindi lang lugar para mag-ehersisyo kundi espasyo rin para makipagkita at makipag-usap sa mga kaibigan.
Dito niya kadalasan nakikilala ang kanyang mga kaibigan, sa mga training session at sa mismong gym.
Dagdag pa niya, ang gym ay nagbibigay-daan para makasama ang mga kaibigan nang hindi kasali sa drinking culture.
Sa PureGym, pinakamalaking gym chain sa UK, 47 porsiyento ng mga bagong miyembro nitong Enero ay may edad 25 pababa.
Samantala, sa The Gym Group, halos 40 porsiyento ng mga miyembro ay Gen Z, o may edad 29 pababa, at higit kalahati sa kanila ay nagsabing nakabuo sila ng bagong kaibigan sa gym.
Lumilitaw na unti-unting nagiging social hub ang gym para sa kabataan, katulad ng papel ng lokal na pub sa nakaraang henerasyon, na nagbibigay ng lugar para sa pakikisalamuha at pakikipagkaibigan.
