Nagpapatuloy ngayong araw ang ikalimang araw ng pre-trial conference para sa impeachment trial ni Vice President Sara Duterte.
Dumating kaninang umaga ang house prosecution team sa pangunguna ni Bicol Saro Representative Terry Ridon habang sa defense team naman ay pinangunahan ni Atty. Michael Poa.
Nasa punto pa rin ng pagmamarka ng ebidensya o exhibits ang dalawang panel na ipiprisinta sa mismong impeachment trial sa July 6.
Kasalukuyang minamarkahan ang libo-libong documentary evidences ng Article 1 o ang misused of confidential funds ni VP Sara.
Samantala, sinabi naman ni Senate Impeachment Court-Clerk of Court Atty. Renato Bantug Jr. na mabubuksan lamang ang selyadong kahon mula sa BIR na naglalaman ng tax records ni Duterte kung bibigyang awtorisasyon ng Senate Impeachment Court.
Ayon kay Bantug, hindi makakapagdesisyon ang pre-trial conference kahit ang clerk of court sa manifestation ng House prosecutors dahil ang Impeachment Court lang ang makakapagdesisyon dito.
Kung hindi madesisyunan ngayon ang tungkol sa manifestation na mabuksan ang kahon, posible ring sa mismong impeachment trial na ito maaaksyunan.
