Nagbalik ng P40 million si dating Department of Public Works and Highways (DPWH) National Capital Region Regional Director, Engr. Gerard Opulencia sa Department of Justice (DOJ).
Ang nasabing halaga ay bahagi ng kanyang commitment na magbalik ng P150 million mula sa maanomalyang DPWH projects nang siya pa ang NCR Director.
Sinabi ni Justice Secretary Fredderick Vida na nasa DPWH si Opulencia subalit nasa floating status.
Ang kundisyon na ibalik ang P150 million ay nakapaloob sa memorandum of agreement na nilagdaan ni Opulencia kapalit ng benepisyo sa pagiging state witness.
Si Opulencia ay isa sa respondents sa flood control complaints, na isinasailalim sa imbestigasyon ng DOJ.
Sinabi ni Prosecutor General Richard Anthony Fadullon, kasalukuyan ang preliminary investigation sa mga nasabing kaso na may kaugnayan sa flood control projects sa Bulacan.
Ang mga reklamo ay malversation of public funds through falsification of public documents, perjury and violation of Republic Act 3019 or the Anti-Graft and Corrupt Practices Act.
Kabilang din sa co-respondents sa mga nasabing kaso sina dating senator Ramon “Bong” Revilla Jr. at dating Congressman Zaldy Co.
