Maghahain ng komento ang Office of the Solicitor General sa Korte Suprema kaugnay ng apela ni Senador Ronald dela Rosa laban sa pagpapatupad ng arrest warrant na inilabas ng International Criminal Court.
Ayon sa OSG, ihahain nila ang kanilang paliwanag sa ngalan ng mga respondent na opisyal ng pamahalaan bago o sa Mayo 16.
Noong Lunes, nagsumite si Dela Rosa ng manifestation para sa agarang proteksiyong hudisyal at humiling ng gabay mula sa Supreme Court of the Philippines hinggil sa legal na epekto ng arrest warrant.
Umapela rin siya na magpalabas ng temporary restraining order o writ of preliminary injunction na magbabawal sa pag-aresto o paglipat sa kanya sa anumang foreign tribunal nang walang pahintulot ng korte.
Binigyan ng Korte Suprema ang mga respondent ng 72 oras para magpasa ng komento, at si Dela Rosa naman ng 72 oras para maghain ng sagot matapos matanggap ang tugon. Bagama’t hindi naglabas ng TRO, sinabi ng korte na maaari pa itong maglabas nito sa mga susunod na hakbang.
Si Dela Rosa ay kabilang sa mga pinangalanan sa arrest warrant ng ICC kaugnay ng kasong crimes against humanity of murder mula Hulyo 3, 2016 hanggang katapusan ng Abril 2018, kung saan tinatayang hindi bababa sa 32 ang nasawi.
Nauna na siyang inilagay sa protective custody ng Senado, ngunit kinumpirma ng isang opisyal ng Senado na umalis siya sa gusali bandang alas-2:30 ng madaling araw.
