Nasamsam ng mga awtoridad ang tinatayang 705 milyong piso na halaga ng pekeng pabango at cosmetic products sa isang operasyon sa Valenzuela City.
Isinagawa ang raid sa dalawang bodega sa Barangay East Canumay sa pangunguna ng Philippine National Police-CIDG, katuwang ang Bureau of Customs, Department of Trade and Industry, at iba pang ahensya. Natuklasan sa inspeksyon ang malaking dami ng counterfeit na produkto na may tatak ng kilalang foreign brands.
Ayon sa imbestigasyon, nagmula ang operasyon sa impormasyon tungkol sa ilegal na pagpasok ng mga produkto sa bansa. Dalawang suspek, kabilang ang isang Chinese na kilala sa alyas na Allen, ang tinutugis ng mga awtoridad.
Patuloy na sinusuri ang mga nakumpiskang produkto upang matiyak ang kalidad at kaligtasan, habang inihahanda ang pagsasampa ng kaso laban sa mga responsable sa ilalim ng Consumer Act of the Philippines.
