Itinalaga ni Pangulong Ferdinand “Bongbong” Marcos Jr. si Dr. Edwin Mercado bilang bagong kalihim ng Department of Health o DOH, kapalit ni Dr. Jose “Brix” Pujalte Jr.
Ayon kay Palace Press Officer Undersecretary Claire Castro, kusang nagbitiw si Pujalte sa puwesto dahil sa kanyang kalusugan. Wala pang isang buwan ang kanyang panunungkulan bilang kalihim ng DOH.
Bago italaga sa DOH, nagsilbi si Mercado bilang president at chief executive officer ng Philippine Health Insurance Corporation o PhilHealth.
May Doctor of Medicine degree si Mercado mula sa University of the Philippines at kumuha rin ng Executive Master’s in Healthcare Administration sa University of North Carolina at Master of Medical Sciences in Global Health Delivery sa Harvard Medical School.
Nakapagtrabaho rin siya sa Zuellig Family Foundation at ilang DOH Centers for Health Development, kung saan nagbigay siya ng technical assistance sa mga provincial health board para sa pagpapaunlad ng healthcare networks.
