Limampu’t pitong pahina ang pre-trial brief na isinumite ng House of Representatives sa Senate Impeachment Court.
5:20 ng hapon kahapon nang pormal na ihatid ni House Secretary General Cheloy Garafil ang dokumento sa tanggapan ni Senate Secretary Renato Bantug.
Kasama sa pre-trial brief ang documentary evidence na nais iprisinta ng House prosecution team sa paglilitis ni Vice President Sara Duterte.
Ayon kay Garafil, nagsumite ang prosekusyon ng dalawampu’t siyam na kopya ng brief, na higit pa sa sapat para sa dalawampu’t apat na senator-judges na uupo bilang miyembro ng impeachment court.
Bukod dito, ipinasa ng Kamara ang entries of appearance ng sampung private lawyers na tutulong sa public prosecutors sa impeachment proceedings.
Tumanggi na ang House official na ihayag ang nilalaman ng pre-trial brief kabilang na ang detalye ng mga testigo na tinukoy.
Una nang sinabi ni House Lead Prosecutor Gerville Luistro na nakasaad sa pre-trial brief ang stipulation of facts at listahan ng mga testigo at ebidensya na planong iprisinta ng prosecutors sa impeachment court.
