Umaasa si Senador Bong Go na mabibigyan pa rin ng pagkakataon si Senador Jinggoy Estrada na gampanan ang kaniyang mandato bilang halal na mambabatas sa kabila ng panibagong 90-araw na preventive suspension na ipinataw ng Sandiganbayan.
Sinabi ni Go nitong Miyerkules, Oktubre 14, na iginagalang niya ang desisyon ng korte, subalit umaasa siyang makababalik sa trabaho si Estrada sa lalong madaling panahon upang magampanan ang kaniyang tungkulin bilang nakaupong senador.
Ayon kay Go, bagama’t magkakapantay na sangay ng pamahalaan ang Senado at hudikatura, umaasa siyang mabibigyan ng pagkakataon si Estrada na muling makapaglingkod sa Senado.
Noong Oktubre 12, iniutos ng Fifth Division ng Sandiganbayan ang panibagong 90-araw na suspensiyon kay Estrada matapos mag-expire ang naunang suspensiyon na ipinataw ng Second Division.
Ang Second Division ang humahawak sa kasong graft laban kay Estrada kaugnay ng umano’y pagkakasangkot nito sa iregularidad sa mga proyekto ng flood control, habang ang Fifth Division naman ang dumidinig sa kasong plunder laban sa senador.
Paulit-ulit namang itinanggi ni Estrada ang mga alegasyong nanghimasok siya sa mga proyekto ng flood control o tumanggap ng kickback mula sa mga ito.
