Target ng British International Investment (BII), ang institusyong pinansyal para sa development ng United Kingdom, na maglaan ng $1.6 bilyon para sa mga proyektong may kaugnayan sa climate financing sa Southeast Asia sa susunod na limang taon, kabilang ang Pilipinas.
Layunin ng pondo na suportahan ang paglipat sa renewable energy o malinis na enerhiya sa mga bansang umaasa pa rin sa mga fossil fuel bilang pinagkukunan ng kuryente.
Ayon sa BII, kalahati ng nakalaang pondo ay inaasahang ilalaan sa pamamagitan ng British Climate Partners, isang inisyatiba para sa climate financing na inilunsad ngayong taon.
Inaasahan ding makalikom ng katumbas na halaga mula sa mga pribadong mamumuhunan.
Kabilang sa mga bansang makikinabang sa programa ang Pilipinas, Vietnam, Indonesia, Malaysia at Thailand.
Mula 2023 hanggang 2025, halos $400 milyon na ang inilaan ng BII para sa climate financing sa Southeast Asia, kabilang ang pamumuhunan sa isang renewable energy company sa Pilipinas na inaasahang makapagbibigay ng 400 gigawatt-hours ng malinis na kuryente kada taon.
Samantala, pinayagan na rin ng pamahalaan noong 2022 ang mga dayuhang mamumuhunan na lumahok sa sektor ng renewable energy sa bansa, alinsunod sa binagong implementing rules and regulations ng Renewable Energy Act of 2008.
