Arestado ang isang 14-anyos na estudyante matapos masugatan ang dalawang kapwa mag-aaral at isang staff member sa isang pananaksak sa loob ng paaralan sa lungsod ng Manchester, ayon sa pulisya nitong Martes.
Sa pahayag ng Greater Manchester Police, inaresto ang menor de edad na babae sa suspetsang assault at kasalukuyang nasa kustodiya para sa imbestigasyon.
Tatlong biktima ang nasugatan: isang 14-anyos na babaeng estudyante, isang 14-anyos na lalaking estudyante, at isang 27-anyos na staff member ng paaralan. Lahat ay nagtamo ng mga sugat na pinaniniwalaang dulot ng saksak, ngunit ayon sa pulisya ay hindi malubha ang kanilang kondisyon at nananatiling stable matapos dalhin sa ospital.
Naganap ang insidente sa Co-op Academy sa hilaga ng sentro ng Manchester, dahilan para magpatupad ng lockdown sa paaralan habang dumating ang mga emergency responders.
Ayon kay Chief Inspector Jon Shilvock, mananatili ang presensya ng mga pulis sa lugar upang magbigay ng seguridad at kapanatagan sa komunidad.
Patuloy namang isinusulong ng pamahalaan ng United Kingdom ang mga hakbang laban sa tumitinding kaso ng youth knife crime at ilegal na pagbebenta ng mga kutsilyo at machete, kabilang sa mga online platform.
Noong Pebrero, isang 13-anyos na batang lalaki rin ang kinasuhan matapos ang umano’y pananaksak sa dalawang mag-aaral sa isang paaralan sa London.
