Nagsagawa ng panibagong airstrike ang Israel sa timog bahagi ng Lebanon matapos nitong utusan ang mga residente sa mahigit 20 lugar na lumikas, ayon sa Lebanon.
Batay sa ulat, isang tao ang nasawi matapos tamaan ng airstrike ang bayan ng Marrakeh sa Tyre district.
Nauna nang nagbabala si Israeli Prime Minister Benjamin Netanyahu na magsasagawa ang kanilang bansa ng mga pag-atake laban sa Hezbollah kung magpapatuloy ang mga pag-atake nito sa hilagang bahagi ng Israel.
Nagaganap ang panibagong tensyon habang lumalakas ang mga ulat na malapit nang maisapinal ang isang kasunduang pangkapayapaan sa pagitan ng Estados Unidos at Iran.
Ayon kay Pakistani Prime Minister Shehbaz Sharif, na tumatayong tagapamagitan sa usapan ng Washington at Tehran, mas malapit na umano ang dalawang panig sa isang kasunduan at maaaring maisapinal ito sa loob ng susunod na 24 oras.
Samantala, sinabi ni Iranian Foreign Minister Abbas Araghchi na malapit nang magkaroon ng kasunduan upang tuluyang matigil ang labanan sa pagitan ng Iran at Estados Unidos. Aniya, kabilang din sa usapan ang pagtatapos ng sigalot sa pagitan ng Israel at Hezbollah sa Lebanon.
Kabilang umano sa mga napag-uusapan ang muling pagbubukas ng Strait of Hormuz, isang mahalagang ruta para sa pandaigdigang kalakalan ng langis at liquefied natural gas, gayundin ang pagluwag ng ilang economic restrictions laban sa Iran.
Bagama’t may umiiral na ceasefire mula pa noong Abril, nagkaroon pa rin ng ilang insidente ng palitan ng pag-atake sa pagitan ng Estados Unidos at Iran nitong mga nakaraang araw.
Nauna ring sinabi ni US President Donald Trump na ipinagpaliban niya ang mga nakatakdang pag-atake laban sa Iran dahil sa pag-usad ng negosasyon para sa isang posibleng kasunduang pangkapayapaan.
Patuloy namang nakatutok ang internasyonal na komunidad sa mga pag-uusap, habang inaasahang magkakaroon ng pinal na anunsyo kaugnay ng kasunduan sa mga susunod na araw.
