Nasa isa sa bawat limang buntis na Pilipina ang natukoy na nutritionally at risk noong 2025, ayon sa pag-aaral ng Department of Science and Technology–Food and Nutrition Research Institute (DOST-FNRI). Katumbas ito ng 16.7 porsiyento, mas mababa kumpara sa 18.5 porsiyento noong 2023.
Batay sa resulta ng 2025 Updating Survey na inilahad sa National Nutrition Summit sa Pasay City, mas mataas ang bilang ng nutritionally at risk na buntis na wala pang 20 taong gulang sa 40 porsiyento, habang nasa 15.9 porsiyento naman ang naitala sa mga buntis na edad 20 pataas.
Nagpakita rin ang survey ng pagbuti sa prenatal care sa bansa. Umabot sa 73.3 porsiyento ng mga buntis ang nakapagpatingin sa tamang oras para sa kanilang unang prenatal checkup, habang 84.8 porsiyento ng mga nasa ikatlong trimester ang nakapagtala ng hindi bababa sa apat na prenatal visits. Gayunman, 22.9 porsiyento lamang ang nakaabot sa inirerekomendang walong prenatal contacts.
Samantala, tumaas sa 48.5 porsiyento ang bilang ng dalawang taong gulang na bata na patuloy na pinapasuso, mula sa 40.9 porsiyento noong 2023. Gayunpaman, nananatiling hamon ang nutrisyon ng mga sanggol at maliliit na bata dahil 21.1 porsiyento ang stunted, 12.7 porsiyento ang underweight, at 6.3 porsiyento ang wasted sa mga batang edad 0 hanggang 23 buwan. Ayon sa DOST-FNRI, mahalaga ang wastong pagpapasuso at sapat na pagkain upang mapanatili ang maayos na paglaki at kalusugan ng mga bata.
