Nag-plead not guilty si Department of Public Works and Highways-4B maintenance division chief Juliet Calvo sa kasong graft na isinampa laban sa kanya may kaugnayan sa P289 million substandard flood control project, partikular ang road dike sa Oriental Mindoro.
Humarap si Calvo sa korte na nakaposas ang mga kamay kay Sandiganbayan Fifth Division chairperson Associate Justice Zaldy Trespeses, at hiniling na tanggalin ang kanyang posas matapos siyang mag-plead not guilty.
Tumayong abogado ni Calvo si Atty Juanito Lim Jr., na kumakatawan din sa anim na iba pang DPWH officials sa parehong kaso, na kinabibilangan nina:
Gene Ryan Altea, DPWH assistant regional director
Ruben D.S. Santos, DPWH assistant regional director
Montrexis Tamayo, DPWH OIC-chief, Planning and Design Division
Dominic Serrano, DPWH construction division chief and Bids and Awards Committee (BAC) chairperson
Dennis Abagon, DPWH OIC-chief, Quality Assurance and Hydrology Division, BAC regular member and
Lerma Cayco, DPWH accountant IV
Isiniwalat ni Atty Lim na ang kanyang mga kliyente mga DPWH officials ay sinuspindi ni Ombudsman Jesus Crispin Remulla dahil sa nakabinbin nilang kasong administratibo laban sa mga ito kaugnay sa parehong flood control case.
Bukod sa graft, nahaharap din ang mga ito sa kasong malversation kasama si dating Ako Bicol party-list Rep. Zaldy Co, ang umano’y may-ari ng Sunwest Corporation at gumawa ng substandard flood control project sa Oriental Mindoro.
Unang naghain ng piyansa na P90,000 si Calvo para sa kanyang pansamantalang kalayaan subalit ikinulong siya dahil sa inamiyendahan ng prosecutors ng Ombudsman ang impormasyon para isama siya sa malversation caser sangkot ang parehong proyekto.
