Kinuwestiyon ng House prosecution panel kung bakit ginamit pa ang confidential funds para sa seguridad ni Vice President Sara Duterte gayong mayroon itong Vice Presidential Security and Protection Group o VPSPG na may nasa 400 tauhan at may hiwalay na pondo.
Ayon kay House prosecution legal spokesperson Benjamin “Jay” Tolosa Jr., lumitaw ang usapin kasunod ng testimonya ni Commission on Audit-Intelligence and Confidential Funds Audit Office supervising auditor Xylene Mae del Campo sa impeachment trial.
Batay sa testimonya ni Del Campo, ginamit ang confidential funds sa surveillance operations kaugnay ng mga aktibidad at engagements ni Duterte, kabilang ang mga inauguration, tree-planting at Christmas activities.
Kinuwestiyon din ni House prosecution spokesperson Rep. Zia Alonto Adiong ang paggamit ng milyun-milyong pisong confidential funds para sa seguridad ng Bise Presidente sa Davao, lalo’t itinuturing umano ng kanilang kampo ang lungsod bilang isa sa mga pinakaligtas na lugar.
