Nilinaw ng kampo ni Vice Presidente Sara Duterte na ang tinatawag na suspicious transactions ay hindi agad nangangahulugan ng ilegal o may maling gawain.
Ito ang naging sagot ng kanyang abogado na si Atty. Michael Poa matapos ilabas ang ulat ng Anti-Money Laundering Council kaugnay ng mga transaksyon na iniuugnay sa bise presidente at sa kanyang asawa na si Manases Carpio.
Sa pagdinig ng House Committee on Justice, sinabi ni AMLC Executive Director Ronel Buenaventura na may 33 suspicious transactions at 630 covered transactions na umabot sa P6.7 bilyon ang na-flag ng mga bangko.
Ayon kay Poa, ang mga ganitong ulat ay paunang hakbang lamang para imbestigahan at hindi agad patunay ng krimen o money laundering.
Dagdag pa niya, posibleng basehan ng pag-flag ng mga bangko ang mga ulat sa media tungkol sa isyu ng confidential funds ng bise presidente.
Sinabi rin ni Poa na lumaki ang kabuuang halaga dahil pinagsama-sama ang lahat ng deposito at withdrawal sa loob ng 18 taon.
Nauna nang itinanggi ni Duterte na may bilyon-bilyong transaksyon sa kanyang bank account at iginiit na malinis ang kanyang rekord sa serbisyo publiko.
