TUGUEGARAO CITY-Kulong ang isang lalaki habang pinaghahanap ang kasamahan nito matapos tangayin ang isang motorsiklo sa bayan ng Solana, Cagayan.
Ayon kay Police Captain Jun Jun Balisi, hepe ng PNP-Solana, gabi ng hunyo 13 nang tangayin ng nahuling suspek na si Rhennel Molarte, 18-anyos ng Brgy Gagaddangan, Allacapan at ang hindi pa nakilalang kasamahan nito ang nakapardang motorsiklo sa harap ng tahanan ng biktima na si Reggie Soliva.
Agad namang ipinagbigay alam ng biktima ang pangyayari sa kapulisan kung kaya’t agad nagsagawa ng checkpoint at nakipag-ugnayan rin sakanilang mga kalapit na police station.
Napadaan naman ang suspek sa inilatag na checkpoint ng PNP-Piat kung saan sinita ito dahil sa maingay na muffler ng motosiklo.
Nang hingan umano ng dokumento ang suspek ay wala itong maipakita
Dito na nagduda ang kapulisan at nakipag-ugnayan na sa PNP-Solana ukol sa nawawalang motorsiklo.
Kinumpirma naman ng biktima na sakanya ang naturang motorsiklo.
Sa ngayon, nasa kustodiya parin ng kapulisan ang motorsiklo dahil gagamitin pa itong ebidensiya habang pinaghahanap pa ang kasamahan ng nahuling suspek.
