Pinayuhan ni Senator Raffy Tulfo ang Department of Labor and Employment (DOLE) na tiyakin na nagbibigay ng 13th month pay ang lahat ng mga employer.
Sa pagpapatuloy ng budget deliberations, napuna ni Tulfo ang maraming mga manggagawa na nagrereklamo dahil hindi nakatatanggap ng 13th month pay kahit ito pa ay iniuutos na ng batas.
Gayunman, paliwanag ni Senator Sherwin Gatchalian na dumipensa sa DOLE 2026 budget, batay sa report ng ahensya ay 99.15% ng mga employer ang nagbibigay ng 13th month pay.
Pero hindi ito tinanggap ni Tulfo dahil marami siyang natatanggap na reklamo tungkol dito at may mga ulat din na hindi dinidisiplina ng DOLE ang mga hindi nagbibigay ng naturang kabayaran.
Bukod dito, napag-alaman pa na inaareglo ng mga kumpanya ang mga field inspector ng DOLE kaya maayos ang report na naibibigay.
Iminungkahi ni Tulfo na pagsuotin ang mga field inspectors ng body-worn cameras para masawata ang underreporting at kanselasyon sa mga business permit ng mga pasaway na employers.
