Binatikos ni Senador Panfilo “Ping” Lacson ang umano’y paulit-ulit na padron ng pagpapa-ospital ng mga kilalang personalidad na nahaharap sa pag-aresto o nakakasuhan ng mabibigat na kaso, kasabay ng panawagang linawin kung sino ang sumasagot sa gastusin ng kanilang pananatili sa Philippine National Police General Hospital (PNP-GH).
Sinabi ni Lacson na matagal na niyang napapansin ang umano’y pagkakasakit ng ilang personalidad tuwing may inilalabas na warrant of arrest laban sa kanila.
Ayon sa senador, madalas umanong lumalabas ang iba’t ibang karamdaman tulad ng pulmonya, mataas na presyon ng dugo, mataas na cholesterol, pananakit ng likod, at iba pang kondisyon kasabay ng paglabas ng kautusan para sa kanilang pag-aresto.
Binanggit ni Lacson ang kaso nina dating Department of Public Works and Highways Secretary Manuel Bonoan at Senador Rodante Marcoleta, na kapwa nahaharap sa mga kasong plunder at graft.Mga Palabas at Programa sa TV
Si Bonoan ay sumuko sa mga awtoridad noong Hunyo 1 at dinala sa ospital matapos makaranas ng hypertension. Nahaharap siya sa kasong graft at plunder na nagkakahalaga ng ₱573 milyon at pinayagan ng Sandiganbayan na manatili sa PNP General Hospital habang nililitis ang kanyang kaso.
Ayon sa kanyang mga doktor, mayroon siyang ilang malulubhang karamdaman kabilang ang chronic kidney disease at severe coronary artery disease.
Samantala, inaresto si Marcoleta noong Hulyo 6 matapos ibasura ng Sandiganbayan ang kanyang mosyon na ipawalang-bisa ang kasong plunder na may kaugnayan sa umano’y ₱75 milyong anomalya.
Dinala rin siya sa PNP General Hospital matapos makaranas ng pananakit ng dibdib at mataas na presyon ng dugo.
Bukod sa usapin ng pagpapa-ospital, kinuwestiyon din ni Lacson kung sino ang sumasagot sa gastusin ng pananatili at pagpapagamot nina Bonoan at Marcoleta sa PNP-GH, na aniya’y pinopondohan ng buwis ng mamamayan at pangunahing nakalaan para sa mga miyembro ng Philippine National Police at kanilang mga dependent.
Sinabi ng senador na plano niyang talakayin ang usapin sa pagdinig ng panukalang 2027 budget ng PNP at Department of the Interior and Local Government upang malinawan kung sino ang may karapatang ma-confine sa naturang ospital at kung sino ang dapat magbayad sa gastusin ng mga pasyenteng hindi kabilang sa mga dependent ng PNP.
Sa ngayon, wala pang pahayag sina Bonoan at Marcoleta kaugnay sa mga naging komento ni Lacson.
