Naglabas ang Sandiganbayan ng precautionary hold departure order (PHDO) laban kay Benguet Rep. Eric Yap at sa kanyang kapatid na si dating ACT-CIS Party-list Rep. Edvic Yap, ayon kay Assistant Ombudsman Mico Clavano.
Ayon sa opisyal, ang PHDO ay inaprubahan sa ilalim ng Rule 8, Section 3 ng 2018 Revised Internal Rules of the Sandiganbayan bilang hakbang para maiwasan ang pag-alis ng mga nasasakdal sa hurisdiksyon habang isinasagawa ang preliminary investigation. Wala pang kasong kriminal na nakabinbin laban sa kanila.
Si Rep. Eric Yap ay itinuturing na person of interest sa umano’y dalawang phase ng hindi natapos na flood control projects sa La Union na nagkakahalaga ng P89.7 milyon bawat proyekto. Ayon kay Ombudsman Jesus Crispin Remulla, si Eric ay inaakalang benepisyaryong may-ari ng contractor na Silverwolves Construction, bagama’t idinedeklara niyang nagbitiw na siya sa kumpanya ilang taon na ang nakalipas.
Nilinaw ni Clavano na ang PHDO ay precautionary measure lamang upang matiyak na hindi makakalayas sa bansa ang mga itinuturing na flight risk habang nagpapatuloy ang imbestigasyon.
Si Rep. Eric Yap ay dating House Committee on Appropriations chairman (2020–2022), samantalang ang kapatid niyang si Edvic Yap ay nagbitiw bilang kongresista noong Pebrero 4, 2026.
