Pormal nang nagtalaga ang Senado ng mga bagong chairperson, vice chairperson, at miyembro ng ilang permanenteng komite kasunod ng pagkakahalal kay Senador Sherwin Gatchalian bilang bagong Senate President.
Sa isinagawang special session nitong Miyerkules, pinangunahan ni Senate Majority Leader Juan Miguel Zubiri ang mosyon para sa pagpili ng mga mamumuno sa iba’t ibang komite ng Mataas na Kapulungan.
Kabilang sa mga itinalagang committee chair sina Senador Bam Aquino para sa Committees on Basic Education, Trade, Commerce and Entrepreneurship, at Science and Technology; Senador JV Ejercito para sa Finance at Local Government; at Senadora Risa Hontiveros para sa Health and Demography at Women, Children, Family Relations and Gender Equality.
Itinalaga naman si Senador Ping Lacson bilang chairman ng Committee on Ways and Means, habang si Senador Francis Pangilinan ang mamumuno sa mga komite ng Constitutional Amendments and Revision of Codes, Agriculture, Food and Agrarian Reform, at Justice and Human Rights.
Pinamumunuan naman ni dating Senate President Vicente “Tito” Sotto III ang Committees on National Defense and Security at Ethics and Privileges, habang si Senador Erwin Tulfo ang bagong chairman ng Blue Ribbon Committee, Energy, at Social Justice, Welfare and Rural Development.
Samantala, si Senador Raffy Tulfo ang mamumuno sa Committees on Public Services at Migrant Workers, si Senador Joel Villanueva sa Labor, Employment and Human Resources Development at Higher, Technical and Vocational Education, at si Senador Migz Zubiri sa Foreign Relations at Rules Committee.
Bukod dito, itinalaga rin sina Lacson, Zubiri, Villanueva, Hontiveros, Sotto, Raffy Tulfo at Ejercito bilang mga miyembro ng makapangyarihang Commission on Appointments.
Kasabay nito, pinangalanan naman sina Aquino, Pangilinan, Lito Lapid at Francis Escudero bilang mga miyembro ng Senate Electoral Tribunal.
Ang mga bagong pagtatalaga ay isinagawa matapos tuluyang maresolba ang halos dalawang linggong sigalot sa liderato ng Senado sa pamamagitan ng pormal na pagkakahalal kay Gatchalian bilang bagong pangulo ng kapulungan.
