TUGUEGARAO CITY- Nagsasagawa ng imbestigasyon ang PNP sa bayan ng Rizal sa Kalinga sa isang bangkay ng lalaki na nakita sa gilid ng kalsada sa Sitio Alibangbang, Liwan West kaninang umaga.
Sinabi ni PCapt. Ruff Manganip, hepe ng PNP Rizal na agad silang pumunta sa lugar matapos na isang concerned citizen ang tumawag sa kanilang himpilan kaugnay sa nakita niyang bangkay.
Ayon kay Manganip, may apat na tama sa likod at isa sa ulo ang lalaki.
Sinabi ni Manganip na kinilala ng kapatid ang bangkay na si Roger Dawagan ng Taga, Pinukpuk, Kalinga.
Subalit, sinabi ni Manganip na posibleng na itinapon lamang sa lugar ang lalaki dahil konti lamang ang dugo kung saan siya natagpuan at nasa tabi lamang niya ang mga basyo ng bala na 9mm. calibre .45 at armalite.
Sinabi din niya na may nakuha din sila sa tabi ng bangkay na papel na may nakasulat na siya ay drug pusher at hindi siya dapat na tularan.
