Dalawang eroplano ng militar ng Estados Unidos ang bumagsak sa magkahiwalay na insidente nitong Biyernes.
Isang crew member ang nailigtas sa Iran, ngunit ang kinaroroonan ng isa pa ay hindi pa rin alam — isang malaking paglala ng tensyon halos limang linggo mula nang magsimula ang digmaan.
Ito ang unang pagkakataon na may naitalang pagbagsak ng mga sasakyang panghimpapawid ng U.S. sa nasabing labanan.
Nangyari ito dalawang araw matapos sabihin ni US President Donald Trump sa isang talumpati na napabagsak at lubusang winasak na ng U.S. ang Iran at tatapusin na nila ang laban sa lalong madaling panahon.
Isinagawa ang rescue habang may search operation ang militar ng U.S., ayon sa mga opisyal ng U.S. at Israel.
Kinumpirma ng Pentagon sa House Armed Services Committee na hindi pa tiyak ang kalagayan ng isang service member.
Samantala, iniulat ng state media ng Iran na isang U.S. A-10 attack aircraft ang bumagsak sa Persian Gulf matapos tamaan ng kanilang defense forces.
Gayunpaman, ayon sa isang opisyal ng U.S., hindi pa malinaw kung ito ay talagang napabagsak, bumagsak, o kung sangkot ang Iran.
Hindi rin agad nalaman ang kalagayan ng crew at eksaktong lokasyon ng insidente.
