Isinumite ng Department of Budget and Management o DBM sa House of Representatives ang panukalang ₱7.2-trilyong pambansang budget para sa 2027.
Ayon kay DBM Acting Secretary Kim Robert de Leon, mas mataas ito ng ₱407 bilyon kumpara sa ₱6.8-trilyong budget ngayong 2026. Karamihan sa dagdag ay para sa mandatory government obligations, kabilang ang mas mataas na National Tax Allotment para sa mga LGU at salary adjustments ng civilian government employees, military at uniformed personnel.
Pinakamalaki ang panukalang pondo para sa Department of Education na nasa ₱976 bilyon, sinundan ng Department of Public Works and Highways na may ₱644 bilyon. Kabilang din sa malalaking benepisyaryo ang Department of Health, Department of the Interior and Local Government, Department of National Defense, Department of Transportation, Department of Agriculture at Department of Social Welfare and Development.
May ₱1.32 trilyon ding nakalaan para sa National Tax Allotment, habang ₱115.62 bilyon ang inilaan para sa Bangsamoro Autonomous Region in Muslim Mindanao at ₱58.53 bilyon para sa Local Government Support Fund.
Samantala, sinabi ni House Speaker Faustino Bojie Dy III na masusing susuriin ng Kamara ang panukalang budget bago ito tuluyang maisabatas. Bibigyang-pansin umano ang paggamit ng pondo at ang konkretong resulta nito para sa publiko, alinsunod sa layunin ng Kongreso na gawing mas bukas at transparent ang proseso ng budget deliberations.
