Nanawagan si Senador Sherwin Gatchalian ng agarang aksyon ng pamahalaan upang tugunan ang lumalalang krisis sa enerhiya dulot ng pagtaas ng presyo ng langis sa pandaigdigang merkado.
Hinimok ng senador ang ehekutibo na makipag-usap sa Iran upang matiyak ang ligtas na pagdaan ng mga oil vessel ng Pilipinas sa Strait of Hormuz, isang kritikal na ruta ng suplay ng langis.
Ayon kay Gatchalian, mahalaga ang high-level diplomatic action upang maiwasan ang pagkaantala ng suplay na lalo lamang nagpapahirap sa mga konsyumer.
Kasabay nito, binigyang-diin ng senador ang potensyal ng Camago-3 gas field sa gitna ng tumataas na energy costs, ngunit aniya, aabutin pa ng panahon bago maramdaman ang epekto nito sa presyo ng kuryente.
Pinayuhan din niya ang patuloy na eksplorasyon at pamumuhunan sa lokal na enerhiya upang matiyak ang sapat na suplay at mas abot-kayang presyo sa hinaharap.
Dahil sa nakaambang pagtaas ng presyo ng LPG, hinimok ni Gatchalian ang Department of Energy at Department of Trade and Industry na pag-aralan ang pagpapatupad ng price cap.
Ayon sa kanya, maaaring gamitin ang probisyon sa ilalim ng Republic Act No. 10623 na nag-amyenda sa RA 7581 upang maprotektahan ang mga konsyumer laban sa hindi makatuwirang pagtaas ng presyo.
Giit ng senador, mahalaga ang LPG sa kabahayan at maliliit na negosyo kaya’t anumang biglaang pagtaas nito ay direktang nakaaapekto sa kabuhayan at presyo ng pagkain.
Sa huli, iginiit ni Gatchalian na kinakailangan ang sabayang hakbang — mula diplomasya, lokal na produksyon, hanggang regulasyon ng presyo — upang matiyak ang sapat na suplay at mapagaan ang epekto ng krisis sa enerhiya sa mga Pilipino.
