Hindi dadalo si Sara Duterte sa nakatakdang pagdinig ng House Committee on Justice kaugnay ng mga reklamong impeachment laban sa kanya.
Kinumpirma ito ni Atty. Michael Poa, isa sa mga abogado ng Bise Presidente, kaugnay ng unang pagdinig ng komite kung saan nauna nang napag-alamang sapat sa porma, substansya, at batayan ang mga reklamo.
Nauna nang naghain ng sagot ang kampo ni Duterte noong Marso 16 matapos ideklarang may sapat na substansya ang mga reklamo noong Marso 4.
Ayon kay Poa, nagtaas sila ng isyu sa due process dahil umano sa hindi pare-parehong pamantayan sa pagdetermina ng sufficiency in form and substance sa mga reklamong impeachment laban sa Pangulo at sa Bise Presidente.
Sa kanilang sagot, hiniling ng kampo ni Duterte sa komite na ibasura ang mga reklamo, iginiit na hindi umano maituturing na impeachable offenses ang mga paratang laban sa kanya.
Binigyang-diin din ng kampo na walang ebidensya ang alegasyon na umano’y pumasok ang Bise Presidente sa isang “contract to kill.”
Ayon pa sa kanilang pahayag, ang mga reklamo ay nakabatay lamang sa “pinalabis na konklusyon” at hindi sapat upang patunayan ang mga mabibigat na paratang tulad ng paglabag sa Konstitusyon, pagtataksil sa tiwala ng publiko, at paggawa ng mabibigat na krimen.
Iginiit ng kampo na ang mga ganitong alegasyon ay hindi maaaring ibatay lamang sa haka-haka at walang matibay na ebidensya.
