Patay ang limang katao habang siyam ang nasugatan matapos na mahulog sa 50 metro na bangin at bumagsak sa ilog ang isang tourist van sa bayan ng Sadanga sa Mountain Province kagabi.
Ayon sa Sadanga police, papunta sana sa Buscalan, Tinglayan, Kalinga ang mga turista para bisitahin si Whang-od, ang tattoo national artist nang mangyari ang aksidente.
Nangyari ang insidente sa Ampawilen sa Barangay Poblacion 10 p.m.
Idineklarang dead on arrival ang driver ng van na si Vance Quinto Hernandez Jr., 45 residente ng Bulacan; Gerardo Navarro, 36, mula sa Zamboanga; Veronica Hipolito, 36, ng South Cotabato; at babae na hindi pa nakilala.
Binawian naman ng buhay ang isa pang pasahero na si Jay Niño Belando, habang dinadala siya sa Bontoc General Hospital sa Bontoc.
Dinala din sa nasabing ospital ang mga sugatan na sina Mary Joy Reyes, 45, ng Manila; Archie Reyes, 25, mula din sa Manila; Cherish Quimpan, 20, residente ng Cavite; Manuel Lap, 26, ng Batangas; Elvis Acupan, 25, ng Ilocos Norte; Ham Sua, 23, ng Tagaytay; Arlette Sarmiento, 23, ng Ilocos Norte; Christine Cuidamat, 20, ng Tagaytay, at Dan Dacoycoy, 24, ng Ilocos Norte.
Iniimbestigahan pa ng pulisya ang sanhi ng aksidente.
