Inihayag ng National Security Council (NSC) na ang mga bote na nakuha mula sa mga Chinese vessel na nag-ooperate malapit sa BRP Sierra Madre sa Ayungin Shoal ay naglalaman ng cyanide, isang nakalalasong kemikal.
Sa isang press briefing, sinabi ni NSC spokesperson Cornelio Valencia Jr. na narekober ng Philippine Navy ang mga bote noong Pebrero 20 at Oktubre 24, 2025.
Sinuri ang mga boteng ito ng National Bureau of Investigation (NBI) Forensic and Scientific Research Service.
Ayon kay Valencia, ang cyanide ay isang mapanganib na substance na maaaring magdulot ng malubhang pinsala sa yamang-dagat, coral reefs, at kalusugan ng tao.
Idinagdag pa niya na karaniwan itong iniuugnay sa ilegal at mapanirang paraan ng pangingisda.
Para sa NSC, ang pagkakaroon ng cyanide sa lugar ay nagdudulot ng seryosong pangamba hinggil sa mga aktibidad na maaaring maging banta sa mga tauhan ng Philippine Navy sa BRP Sierra Madre, pati na rin sa kabuhayan ng mga Pilipinong mangingisda.
Nagbabala rin siya na maaaring sirain ng cyanide ang mga coral reef sa paligid ng shoal, na posibleng makaapekto sa structural stability ng Sierra Madre.
Ayon kay Valencia, ang ganitong mga aksyon ay maaaring lumabag sa mga batas pangkalikasan ng Pilipinas at sa mga pandaigdigang patakaran sa karagatan.
Inatasan na ang Armed Forces of the Philippines (AFP) at ang Philippine Coast Guard (PCG) na paigtingin ang pagbabantay sa karagatan, palakasin ang pagpapatrolya, at pigilan ang karagdagang pinsala sa kapaligiran.
Ang Ayungin Shoal ay isang lubog na bahura sa Spratly Islands, na matatagpuan 105 nautical miles sa kanluran ng Palawan at nasa loob ng 200-mile exclusive economic zone ng Pilipinas.
