Nagsampa ang Office of the Ombudsman ng mga kasong plunder at graft laban kay Senador Jinggoy Estrada sa Sandiganbayan kaugnay ng umano’y pagkakasangkot nito sa kickbacks mula sa mga flood control projects ng pamahalaan.
Ayon sa Ombudsman, bahagi ito ng patuloy na imbestigasyon sa umano’y iregularidad sa paggamit ng malalaking pondo ng gobyerno para sa mga proyekto na dapat sana ay para sa imprastraktura at kaligtasan ng publiko.
Hindi ito ang unang beses na naharap si Estrada sa mabibigat na kaso. Una siyang kinasuhan noong 2001 kaugnay ng jueteng scandal, at muling naharap sa plunder at graft noong 2014 dahil sa umano’y anomalya sa paggamit ng PDAF o pork barrel funds.
Bagama’t naabsuwelto sa ilang naunang kaso, nananatili pa ring may nakabinbing usaping legal ang senador sa Sandiganbayan habang patuloy ang mga bagong kasong isinampa laban sa kanya.
