Nagkaroon ng bahagyang kalituhan sa pagdinig ng impeachment trial matapos tanungin ni Senator-Judge Robin Padilla ang National Bureau of Investigation (NBI) Senior Agent na si John Mark Calilung tungkol sa pagkakakilanlan ng orihinal na kumuha ng video ng press briefing ni Vice President Sara Duterte.
Sa pagtatanong, nais ni Padilla na malaman kung nakuhanan ng affidavit ang mismong taong nag-record ng video upang mapatunayan ang pinagmulan at kredibilidad ng ebidensyang iniharap sa impeachment court.
Sa una, lumabas na si Calilung ang gumawa ng screen recording ng video gamit ang isang application bilang bahagi ng imbestigasyon ng NBI, na nagdulot ng kalituhan sa pagdinig.
Gayunman, nilinaw kalaunan na ang tinutukoy ni Padilla ay hindi ang gumawa ng screen recording, kundi ang mismong taong nag-film o kumuha ng orihinal na video ni Vice President Duterte upang matiyak ang pagiging tunay at pagiging kapani-paniwala ng ebidensya.
