Pinangunahan ng Pilipinas, sa pamamagitan ng Department of Finance at Bangko Sentral ng Pilipinas, ang ASEAN Finance and Central Bank Deputies’ Meeting – Working Group (AFCDM-WG) noong Pebrero 13, 2026, upang palakasin ang integrasyong pinansyal sa Southeast Asia.
Binigyang-diin ni DOF Undersecretary Joven Balbosa na layunin ng bansa na tiyakin na ang regional cooperation ay magdudulot ng konkretong benepisyo sa negosyo, mamumuhunan, at mamamayang ASEAN.
Kabilang sa pangunahing prayoridad ang pagpapabilis at pagpapamura ng cross-border payments, pagpapalawak ng access sa serbisyong pinansyal, pagpapatatag sa kakayahan ng rehiyon na harapin ang krisis pang-ekonomiya, at pagpapaunlad ng merkado para sa pangmatagalang paglago.
Bilang co-chair, katuwang si BSP Managing Director Thomas Benjamin Marcelo sa pagtutulak ng polisiya at kooperasyon ng mga ekonomiya sa ASEAN.
Ang mga napagkasunduan sa Bohol ay itataas sa ASEAN Finance and Central Bank Deputies’ and Governors’ Meetings sa huling bahagi ng taon bilang hakbang patungo sa mas inklusibo at matatag na ASEAN Economic Community matapos ang 2025.
