Patuloy ang search and retrieval operation ng Municipal Disaster Risk Reduction and Management Office (MDRRMO) Gattaran, iba pang katuwang na ahensiya at mga lokal na residente upang hanapin ang isang 68-anyos na lalaki na hinihinalang nalunod sa ilog noong SabadoNovember 29, 2025 bandang alas-3 ng hapon.
Ayon kay Dennis Domingo ng MDRRMO Gattaran, batay sa paunang imbestigasyon nagtungo ang matanda sa ilog upang maglagay ng lambat para mangisda nang siya ay nadulas at nahulog nang padapa.
Dahil sa lakas ng agos, nahirapan siyang tumayo at makalipas ang ilang sandali ay bigla siyang nawala sa ilalim ng tubig.
Samantala, may ilang residente umano ang nakapansin ng bagay na lumulutang sa ilog, ngunit dahil sa layo na humigit-kumulang 200 metro at sa lakas ng agos, hindi ito naabot.
Lalo pang pinahirap ng biglaang malakas na ulan, na nagdulot ng pagtaas ng tubig at mas mabilis na agos ng ilog.
Agad sinuyod ng mga awtoridad ang bahagi kung saan posibleng inanod ang biktima, ngunit hanggang ngayon ay hindi pa rin ito natatagpuan.
Patuloy ang operasyon, at umaasa ang lahat na agad na marekober ang katawan ng biktima.
