Lumubog ang isang merchant ship matapos tamaan ng drone sa Black Sea, malapit sa baybayin ng Bulgaria, habang nawawala naman ang mga miyembro ng crew nito.
Ayon kay Bulgarian Prime Minister Rumen Radev, dalawang barko ang tinamaan ng drone attack sa loob ng exclusive economic zone ng Bulgaria, na miyembro ng NATO.
Nasagip ang crew ng isang barkong may kargang butil, bagama’t dalawang tao ang nasugatan. Samantala, lumubog ang Togo-flagged vessel na tinamaan din ng pag-atake, ngunit hindi pa malinaw kung ilan ang sakay nito.
Sinabi ni Radev na hindi pa matukoy kung mula Russia o Ukraine ang mga drone, ngunit sinabi ng isang maritime security source na batay sa paunang pagsusuri, posibleng Russian attack ang nangyari.
Kinondena ni Radev ang pag-atake sa mga civilian vessel at nagbabala na maaaring lumawak pa ang giyera sa Ukraine at tumaas ang panganib ng mas malawak na tunggalian.
Nagsagawa na ng search and rescue operation para sa nawawalang crew at iniimbestigahan din ang posibleng epekto ng insidente sa kapaligiran.
Ang insidente ay kasunod ng hiwalay na pag-atake sa Black Sea kung saan dalawang katao ang nasawi sa sunog sa isang barko malapit sa Romania, dahilan upang tumaas ang pangamba sa seguridad ng commercial shipping sa western Black Sea.
