Kinuwestiyon ni Senator-Judge Alan Peter Cayetano ang kahilingan ni National Bureau of Investigation (NBI) Director Atty. Melvin Matibag na mauna siyang tumestigo sa impeachment trial laban kay Vice President Sara Duterte dahil sa naka-iskedyul niyang pagdalo sa isang law enforcement summit sa Thailand.
Sa ikaapat na araw ng impeachment trial, sinabi ni Cayetano na nasa “bad taste” umano ang tila pagdidikta ng NBI chief na hindi siya makakadalo sa pagdinig sa susunod na linggo dahil sa biyahe sa ibang bansa.
Ayon kay Cayetano, maraming opisyal ng pamahalaan ang nag-adjust ng kanilang mga iskedyul upang mabigyang-prayoridad ang impeachment trial na isinasagawa tuwing Lunes hanggang Miyerkules.
Aniya, bilang dating kalihim ng Department of Foreign Affairs, naniniwala siyang maaaring magtalaga ang NBI ng ibang opisyal na dadalo sa naturang summit.
Si Matibag ay inaasahang magiging testigo ng House prosecution kaugnay ng imbestigasyon ng NBI sa umano’y banta ni VP Sara laban kina Pangulong Ferdinand Marcos Jr., First Lady Liza Araneta-Marcos, at dating House Speaker Martin Romualdez.
