Patay ang isang limang taong gulang na lalaki at sugatan ang ibang miyembro ng pamilya matapos paulanan ng bala ang kanilang sasakyan sa Barangay Macasampem, Guindulungan, Maguindanao del Sur kagabi.
Ayon sa imbestigasyon ng Maguindanao del Sur PNP, apat na hindi kilalang suspek ang nagpaputok habang dumadaan ang sasakyan sa National Highway patungong Datu Saudi Ampatuan.
Bagamat tinamaan ang driver, nagawa pa nitong magmaneho hanggang Datu Saudi Ampatuan, kung saan agad silang dinala ng mga pulis sa IPHO Maguindanao.
Ang mga biktima ay mga residente ng Barangay Libutan, Mamasapano, Maguindanao del Sur.
Nakuha sa crime scene ang 11 basyo ng hindi pa matukoy na uri ng baril.
Matapos mabigyan ng medikal na atensyon, dinala ang mga biktima sa kanilang mga kamag-anak.
Patuloy ang imbestigasyon ng Guindulungan PNP upang matukoy ang mga salarin at ang motibo sa insidente.
