Nasawi ang isang 7-anyos na batang lalaki matapos malunod sa Chico River sa Sto. Niño, Cagayan nitong Linggo ng umaga matapos manguha ng kahoy kasama ang tatlo niyang kaibigan.
Ayon kay PMSGT. Harim Corpuz, PNP Sto. Niño, maagang nagtungo ang mga bata sa pampang ng ilog upang mangolekta ng kahoy at langis.
Habang nagpapahinga, nakatulog sandali ang biktima.
Pagkagising, nagtungo siya sa gilid ng ilog upang maghilamos at uminom ng tubig, ngunit biglang lumalim ang bahagi ng ilog na kanyang pinagkuhanan ng tubig.
Dahil sa biglaang lalim at malakas na agos, nalunod ang bata.
Sinubukan pa siyang abutin ng mga kaibigan gamit ang kawayan, ngunit hindi nila ito naabot.
Agad namang humingi ng tulong ang mga bata at naiparating ang insidente sa barangay at MDRRMO, na agad naglunsad ng search and rescue operation.
Natagpuan ang katawan ng biktima humigit-kumulang 100 metro mula sa pinangyarihan ng insidente.
Nagpaalala ang mga awtoridad sa publiko na iwasang pumunta sa mga ilog ngayong panahon ng tag-ulan dahil sa biglaang pagtaas ng tubig at malakas na agos, at muling iginiit ang mas mahigpit na pagbabantay sa mga bata.
